FOCO Singular
Sección dedicada a voces autorais da animación contemporánea que destacan por unha ollada persoal, libre e recoñecible. Nesta edición, o Foco Singular reúne o traballo de Réka Bucsi e Nicole Stafford, dúas creadoras internacionais cuxa obra transita entre a experimentación visual, a sensibilidade artística e unha forte identidade propia.
>> Charla conxunta das dos directoras + retrospectiva XOVES 12 DE MARZO ÁS 18:15H
Cedida por Réca Bucsi
Réka Bucsi
Réka Bucsi é unha cineasta de animación húngara. Graduouse cun mestrado en realización de cinema de animación na Universidade de Arte e Deseño Moholy-Nagy de Budapest. A súa película de graduación, SYMPHONY NO. 42, foi preseleccionada para os Premios Óscar en 2014 na categoría de Mellor Curtametraxe de Animación. As súas películas persoais foron proxectadas en numerosos festivais de cinema de todo o mundo, incluíndo tres estreas na Berlinale – Sección Shorts (2014, 2016 e 2018), ademais de competir en dúas ocasións en Sundance (2015 e 2016), así como en Annecy, o BFI London Film Festival e en SXSW en dúas edicións (2016 e 2018). O seu curtametraxe LOVE foi nomeado a Mellor Curtametraxe nos Premios do Cinema Europeo en 2017.
A súa película SOLAR WALK gañou o Audi Short Film Award na Berlinale 2018 e o Gran Premio no Ottawa International Animation Festival 2018. Ademais, foi nomeada aos Annie Awards en 2019 na categoría de Mellor Curtametraxe e actualmente forma parte do catálogo de The Criterion Channel. Réka é membro da Academia de Cinema Europeo desde 2017 e membro da Academia de Artes e Ciencias Cinematográficas (AMPAS) desde 2021.
Formou parte do xurado en 18 festivais internacionais de cinema, entre eles o Xurado Internacional de Berlinale Shorts 2020, o Festival de Cinema de Sarajevo 2022, o Festival Internacional de Cinema de Shanghái 2024 e o Festival Internacional de Cinema de Animación de Annecy 2025, onde ademais se proxectou un programa retrospectivo da súa obra. Festivais como o GLAS Animation Festival, o Animateka Festival e o London International Animation Festival tamén presentaron retrospectivas do seu traballo. Foi relatora en Pictoplasma tanto en Berlín como en Nova York, no Pratt Institute de Nova York, en The New School NYC, na FMX Conference on Animation en Alemaña, e exerceu como profesora convidada no California Institute of the Arts.
Entre os seus clientes figuran Cartoon Network, Adult Swim, Netflix, Hulu, Vimeo, YouTube, Apple Music e FX Networks.
Retrospectiva
LOVE
Réka Bucsi | 14 min | Hungría | 2016 | +12
A curtametraxe foi nomeada a Mellor Curtametraxe nos Premios do Cine Europeo e seleccionada en festivais como a Berlinale, Sundance, Clermont-Ferrand, SXSW, BFI London Film Festival ou o Hong Kong International Film Festival. No apartado de premios, obtivo o Jury Prize á Mellor Curtametraxe de Animación no RiverRun International Film Festival, así como recoñecementos á Mellor Animación Húngara en Friss Hús e á Mellor Curtametraxe Internacional no Bosphorus Film Festival, ademais do premio á Mellor Música Orixinal en ZubrOFFka.
LOVE é unha curtametraxe que describe o afecto en tres capítulos diferentes, a través do impacto nun sistema solar afastado. Situacións abstractas, de carácter case haiku, revelan o cambio de atmosfera nun planeta, provocado pola alteración da gravidade e da luz. Este planeta palpitante fai que os seus habitantes se convertan uns cos outros de múltiples maneiras.
Retrospectiva
SOLAR WALK
Réka Bucsi | 21 min | Dinamarca | 2018 | +12
Solar Walk foi galardoada co Gran Premio á Mellor Curtametraxe no Ottawa International Animation Festival e co Audi Short Film Award na Berlinale, ademais de ser nomeada aos Premios Annie e formar parte da The Criterion Collection. A obra foi tamén seleccionada en festivais como Clermont-Ferrand, SXSW ou o BFI London Film Festival, e obtivo o Gran Premio á Mellor Curtametraxe en IndieLisboa e o premio ao Mellor Son no festival Fantoche.
olar Walk segue a viaxe de individuos e das súas creacións no espazo, evocando o efecto liberador da escrita automática dos surrealistas, entendida como activación do inconsciente e do onírico. O espazo convértese así nun lugar de reflexión sobre o comportamento e a percepción, onde toda acción só ten sentido se crea algo verdadeiro ou se coida realmente dos demais.
Retrospectiva
Intermission
Réka Bucsi | 5 min | Hungría | 2022 | +12
Movemento repetitivo e estático ao mesmo tempo, unha exploración da imaxe visual polo seu propio valor. Unha proxección de imaxes mentais que se forman mentres se escoita música. Desde o xesto simple de debuxar unha liña ata o movemento intricado e a estrutura complexa da animación, capaz de xerarse a si mesma.
Cedida por Nicole Stafford
Nicole Stafford
Nicole Stafford é unha animadora e deseñadora 2D actualmente afincada en Los Ángeles. Desenvolve o seu labor principalmente para estudos comerciais da cidade, combinando este traballo coa creación de videoclips independentes e curtametraxes de animación, onde explora unha vertente máis autoral e experimental.
Formouse no California Institute of the Arts (CalArts) e posteriormente en Gobelins, l’école de l’image (París), dúas das escolas máis prestixiosas do mundo da animación. Durante esta etapa pasou a formar parte do colectivo creativo Souviens Ten-Zan, integrado por doce artistas internacionais e actualmente representado por Passion Pictures Paris, desde onde desenvolven tanto proxectos comerciais como películas propias.
Ao longo da súa traxectoria, Stafford participou como directora, codirectora, animadora principal ou directora creativa en proxectos exhibidos en festivais de referencia como Sundance, Berlinale ou Annecy. Entre os seus traballos máis destacados atópase a curtametraxe The Hork (2022), seleccionada no Sundance Film Festival, onde optou ao Short Film Grand Jury Prize, e nomeada tamén a Mellor Curtametraxe no Denver Film Festival e no CineFest – Miskolc International Film Festival, confirmando a súa proxección internacional no circuíto de festivais.
Ademais, colaborou en producións recoñecidas como Solar Walk (dir. Réka Bucsi), LOVE ou Hang On to the Night, e participou en series e proxectos de gran impacto cultural como Adventure Time (Hora de Aventuras/Cartoon Network) ou Scavengers Reign (Max/HBO Max). En 2021 realizou o filme de apertura de TEDx Sydney e desenvolveu segmentos animados para o desfile Savage x Fenty de Rihanna en Amazon Prime.
O seu traballo caracterízase por unha animación expresiva, unha identidade gráfica moi definida e unha notable capacidade para transitar entre a industria e a creación independente sen perder unha voz propia, consolidándose como unha das figuras máis interesantes da animación contemporánea internacional.
Retrospectiva
The Hork
Nicole Stafford | 4 min | Francia | 202 | +12
Nunha dimensión alternativa, o estoico deus do Poder-Non-Recoñecido agarda a que a implacable Avaricia veña consumir o seu poder. Curtametraxe seleccionada no Sundance Film Festival, onde optou ao Short Film Grand Jury Prize, e nomeada tamén a Mellor Curtametraxe no Denver Film Festival e no CineFest – Miskolc International Film Festival.
Retrospectiva
Wildfire
Nicole Stafford | 4 min | Francia | 2015 | +12
Ena é unha bombeira apaixonada. A súa dedicación ao traballo afecta á súa vida familiar. Debido ás frecuentes viaxes ás intervencións, descoida ao seu marido e ao seu fillo. Porén, a súa fascinación pouco común polo lume é máis forte.