Estreada en 1998, Kirikú e a bruxa é unha das obras máis fundamentais da animación europea contemporánea e o filme que situou Michel Ocelot como unha das grandes voces da animación de autor. Inspirándose nos contos tradicionais da África Occidental, o director construíu un relato luminoso e humanista que segue a viaxe de Kirikú, un neno pequeno e extraordinariamente sabio que decide liberar a súa aldea da temida bruxa Karabá. A través desta aventura iniciática, a película aborda temas universais como a valentía, o poder do coñecemento, o cuestionamento das aparencias e a importancia da comunidade.

A nivel visual, o filme abriu camiños novos dentro da animación europea: as súas composicións planas, os patróns inspirados na arte africana e a súa vibrante paleta de cores crean un universo gráfico recoñecible e profundamente expresivo. Kirikú e a bruxa foi recoñecida internacionalmente con premios como o Cristal á Mellor Longametraxe en Annecy, Chicago e Cinekid, ademais do galardón ao Mellor Largometraxe Europeo nos British Animation Awards, consolidándose como un clásico contemporáneo que continúa a influír novas xeracións de espectadores e creadoras.

Este ano, IMAXINARIA quere celebrar esta obra mestra cun formato excepcional: unha proxección con música en directo a cargo de Rosin de Palo. O dúo, recoñecido pola súa exploración sonora a través do violoncelo, a percusión orgánica e a experimentación rítmica, ofrecerá unha reinterpretación sonora que dialoga coa película desde unha sensibilidade contemporánea e profundamente emotiva. O público poderá gozar así dunha experiencia inmersiva, onde a forza visual do filme e a súa dimensión simbólica se amplifican coa intensidade física do son en directo.

Con esta proposta, IMAXINARIA convida a redescubrir Kirikú e a bruxa desde unha perspectiva nova e vibrante: unha homenaxe que honra o legado de Michel Ocelot ao tempo que celebra a capacidade da animación para transformarse, renovarse e seguir sorprendendo máis de vinte e cinco anos despois da súa estrea.